Es canalizacions entara explotacion idroelectrica

Era aigua se derive deth riu cap as centraus idroelectriques a trauès d'un sistèma de canalizacions que conforme un autentic riu amagat. Ena mapa se pòt veir, diboishat en vermelh sus eth hilat fluviau dera Val d'Aran, aguest riu enterrat

Era derivacion d'aigua a efèctes importants sus eth riu. Era grafica de dejós ensenhe eth cabau dera Garona ath long der an en Arties abans (blu) e dempús (vermelh) dera metuda en foncionament dera centrau. Eth 80% dera aigua que portaue eth riu ara se derive cap as canaus artificials.

Era derivacion d'aigua tanben produsís cambis en regim naturau deth cabau. Per exemple, en següent grafic se pòden apreciar pics regulars en nivèu dera aigua dera Garona apròp de Bossòst cap ath metdia pendent eth mes d'agost, quan se dèishe córrer era aigua tara practica d'espòrts aqüatics en riu.

Un aute exemple son es baishades de cabau es dimenges. Son es pics que van tà baish ena grafica de dejós. Es dimenges baishe era demana d'electricitat. Alavetz es centraus s'arturen e era aigua ei retenguda enes embassaments dera cabecèra dera Val.

Entà minimizar aguestes afectacions e perméter un bon funcionament der ecosistèma fluviau, era normativa mèrque uns cabaus de manteniment que fixen autant era quantitat com era modulacion deth cabau que cau respectar quan se hèn detraccions d'aigua deth riu.

Es installacions de derivacion d'aigua soent an ua petita restanca o barratge entà pujar eth nivèu d'aigua e derivar-la cap ara canalizacion. Açò supòse un obstacle entara fauna des rius, es pèishi en especiau, e trinque era connectivitat der ecosistèma. Entà minimizar açò se construïssen escales de peishi, com era que se ve ena fòto, o d'auti sistèmes que faciliten as peishi sauvar es obstacles.

Eth Conselh Generau d'Aran a un hilat de sensors deth nivèu des rius installadi en diuèrsi pònts. Es dades en temps reau se pòden consultar ací.