NAVEGACION DAMB GPS

Eth sistèma de guida per GPS ei ua ajuda tara navegacion. En condicions optimes, mos pòt condusir pes itineraris damb fòrça precision. Totun i a fòrça factors (com ara eth relèu deth terren, obstacles o bromes que distorsionen era senhau deth satellit, o era sensibilitat deth nòste pròpi dispositiu) que pòden afectar ara precision. Per açò ei important balhar tanben atencion as indicacions escrites enes punts de rota e sajar d'avalorar en tot moment era nòsta posicion a compdar dera interpretacion dera mapa, coma manères de confirmar eth posicionament GPS. Era aplicacion mos mòstre era nòsta posicion entorada per un cercle blu que represente era precision dera localizacion, que pòt èster variabla. Cau tier en compde qu'era nosta posicion reau pòt èster en quaussevolh punt laguens d'’aguest cercle.

Cau auer activada en vòste dispositiu era opcion de localizacion per GPS.

Eth consum de bateria peth sistèma GPS ei naut, cau portar era bateria cargada ath 100% quan comencem er ’itinerari. Entà estauviar ath maxim era bateria ei recomanable de portar eth dispositiu en mòde de demora pendent er l’itinerari, enquia que s'entene era senhau acustica e era vibracion d'avís en arribar a bèth punt d'interès.

Tanben ei recomanable d'auer-lo en mòde “avion” en zònes sense cobertura entà evitar era despena de cercar senhau sense exit



SEGURETAT

Enes itineraris a pè, especiaument aqueri en zòna de nauta montanha:

  • Abans d'escuélher un itinerari, valorem era dificultat e es nòstes capacitats e experiéncia.
  • Cau portar caucèr adequat.
  • Encara qu'en gésser hèsque bon temps, ei recomanable portar en morralet bèra pèça d'abric e un impermeable en prevision d'un cambi de temps inesperat o d'auer d'abrigar a quauquarrés qu'age patit un accident.
  • Cau béuer pro pendent era caminada tà mantier ua bona idratacion, e protegir-mos deth solei damb capèth, lunetes e crema protectora.
  • Enes itineraris en coche: Bèra ua des persones que non conduïsque ei qui a de manipular e manipular eth dispositiu mobil, entà evitar distraccions deth conductor.

En cas d'accident, cau seguir eth protocòl PAS - Protegir, Avisar, Socórrer

  • PROTEGIR a qui a patit er accident e a nosati, entà evitar d'empejorar es conseqüéncies
  • AVISAR as servicis de socors: trucar ath 112 (generau) o ath 973 640 080 (Pompièrs Val d’Aran). Tietz en compde qu'en fòrça zònes de nauta montanha non i a cobertura. Per açò ei convenient rebrembar quin ei eth darrèr lòc a on n'i auie.
  • SOCÓRRER as persones herides, ena mesura des nòsti coneishements de prumèrs auxilis e s'auem era seguretat de non agreujar era situacion.


RESPÈCTE PETH MIEI

Er aument dera freqüentacion deth miei naturau a hèt que tanben activitats aparentament innòcues agen efèctes negatius. Per açò ei fòrça important auer un comportament respectuós damb eth miei e extremar es precaucions entà non alterar-lo. Era règla generau ei que non deishem cap traça deth nòste pas. Es principaus impactes que s'an detectat e bères manères d'evitar-les son:

Erosion e compactacion deth terren en caushigar-lo - Evitem caminar per dehòra des sendèrs mercadi e préner drecères. Enes passi estrets e arribents, coma norma de cortesia, qui baishe cedís eth pas ath que puge.

Molestar ara fauna, en especiau as espècies protegides, autant as individus coma ath sòn abitat - Evitem cridar e hèr massa tapatge. Susvelhem qu'eth nòste can non acace ne ataque era fauna sauvatja. Respectem es sòns abitats: per exemple, non botgem ròques o troncs que les poguen servir de refugi, non lancem pèires enes rius e estanhs, ne metegam obstacles ara corrent d'aigua enes rius. Rebrembatz qu'eth banh e es espòrts aquatics non son permetudi enes estanhs.

Recolleccion d'espècies botaniques, plan especiaument es protegides - Evitem arrincar flors e plantes. Respectem es regulacions ena recuelhuda d'espècies comestibles, coma misharnons e d'auti. Non recollectem fruts damb metòdes agressius entàs plantes.

Generacion de residus - Non deishem cap tipe de lordèra en miei, tanpòc es que pòden servir d'aliment entara fauna sauvatja: non formen part dera sua dièta naturau e les hèn a cambiar es sòns abits d'alimentacion e de comportament.

Huecs forestaus - S'auem d'alugar huec, ac haram sonque enes lòcs exprèssament condicionats, e susvelhem-lo. Non lancem puntes de cigarretes, ne alugades ne amortades.